مشهد عادي إلى لوحة تجريدية

 

"في عمق كل فنان بحر لا يُرى، وأمواجه هي ما نُسميه إبداعًا

جبران خليل جبران 

هذي اللوحة كانت طلب من عميل أحول له لقطه التقطها كذكرى له الى لوحة فنيه ب أسلوب تجريدي ، كانت تحدي بالنسبه لي سوا من اختيار الالوان او طريقة الدمج او حتى إظهاري للامواج بطريقه توصل احساس البحر وبنفس الوقت بطريقه فنية مميزة ، اخذت وقتي فيها وعلى مراحل والنتيجه صارت مبهرة 💘😍 

1- كيف قعدت أشوف اللوحة قبل أبدا فيها 

في كل لوحة او عمل انطباع مبدئي تقدر تاخذه قبل تبدا في الرسم ، يكون في ألوان اللوحة ، تقسيمها ، الأضاءة البارزه في المشهد ، الزوايا الي راح تبدأ منها 

في هذي اللوحة اول شي بديت أركز فيه هو كيف بشتغل على تداخل الالوان ، من بحر بدون ملامح إلى لوحة مرسومة حية بالالوان والتناغم ب أسلوب تجريدي .

2- التخطيط المبدئي وأهميته 

قبل ما أبدأ أرسم فعليًا، أعطي نفسي يوم كامل بس عشان التخطيط. أحب أجلس مع الفكرة بهدوء، أتخيل شكل اللوحة، وأدوّن كل التفاصيل اللي تخطر في بالي. أقعد أطالع الألوان، وأجرب توزيع الخطوط، وأشوف ايش الاتجاه اللي يناسب كل جزء في اللوحة .

 التخطيط بالنسبة لي جزء مهم من العملية الإبداعية، لأنه يخلّيني أوصل لصورة واضحة قبل لا ألمس الفرشة. يمكن ياخذ وقت، بس يريحني ويساعدني كثير في إنجاز اللوحة بدون م ارجع اعدل كثير بالقياسات .

3- فهمت تدرجات الالوان 

في هذي اللوحة اخترت اني ابتعد عن الالوان التقليدية لرسم بحر ، ركزت على تدرج اكثر من لون ، حاولت اشوف الفن لو كان على هيئة بحر ، اكثر من كونه مشهد واقعي والسر كان في دمجي للالوان وكل مره اكتشف لون ودرجة جديدة تطلع معايا . 

استخدمت الأزرق كلون قاعدة اساسي للوحة ، ثم بديت ادمج تدرجاته زي التركوازي - الاخضر - الموف - الازرق الفاتح ، وعجلة الالوان ساعدتني كثير في الدمج 

درجات الاخضر استخدمت جزء منها لرسم انعكاسات البحر 

هنا الالوان الي أسست فيها اللوحة 

ألوان سطح البحر + الاضاءة 

4 - الشكل الهندسي في الامواج 

قررت أرسم الامواج بطريقة مختلفة عن المعتاد ، بدل ماتكون منحنيه وطبيعية ،عطيتها شكل هندسي أكثر ، بخطوط واضحة ولكن زوايا ناعمه حتى الدمج يكون نظيف وبنفس الوقت تنقل الاسلوب التجريدي بدون م أخفي ملامح اللوحة وتفاصيلها . 

 

5 - التحدي الي واجهني في رسم هاللوحة 

أكبر تحدّي واجهني بهذي اللوحة كان إني أوازن بين الدمج الناعم للألوان وبين الشكل الهندسي للموج. 

التجريد يبغاله حرّية وتكون واثق بضربات وكميه الالوان الي بتستخدمها ، وانا اشوف كل ماكانت كميه اللون كبيره وقويه ، بيطلع معاك تشبع قوي ومميز للرسمه ، بس الخطوط الهندسية تبغى دقّة وثبات، فكنت كل شوي أرجع أعدّل عشان ما يطغى واحد على الثاني.

 الدمج بين الموف والتركواز والأزرق كان يحتاج لمسات خفيفة عشان يظل الإحساس بالحركة موجود، وفي نفس الوقت ما يضيع الشكل الهندسي اللي يعطي اللوحة أسلوبها المميز . حسّيت إني كل ما ركّزت على جانب، لازم أرجع أوازن الثاني، وهذا الشي خلّى عملية الرسم ممتعة ومليانة تحدّي بنفس الوقت.

6 - الألوان الغامقة والفاتحة باللوحة 

مهم جدا التوازن بين الالوان الغامقة والفاتحة وقت الرسم ، لان هذا التضاد يعطي عمق وإحساس للعمل ،الدمج بين هذي الالوان لازم يكون بحذر وفهم لان الغامق اذا زاد راح يخفي التفاصيل والفاتح اذا كثر راح يضيع الاحساس بالعمق .

استخدمت اللون الاخضر الغامق في اللوحة حتى يمثل عمق الموجات ، الموف والازرق الفاتح مثل انعكاس الموجات على السطح ، هالتوازن بين الضوء والظل هو الي اعطى عمق وروح للوحة أكثر . 

7 - متى أعرف ان اللوحة اكتملت 

تعرف ان اللوحة اكتملت اذا حسيت انه اي اضافة لها ممكن تخرب اللوحة، هنا لازم توقف لانه الرسام بطبيعته يحب كل شي مثالي في اللوحة وكل م اضفت لون تحس تبغى تضيف زياده وهنا احيانا يكون مشكله ، اللوحة تخرب اكثر من انك  تعدل عليها . 

لما يجيني هذا الشعور اوقف احيانا تحتاج تاخد بريك يوم بعيد عن اللوحة ، لان التركيز المتواصل احيانا يعميك عن الجمال الي وصلت له وتصير تبغى تضيف زياده ، بالنسبه لي اني اخذ بريك منها يساعدني اشوف اللوحة من زاويه ثانيه واحيانا م يحتاج لها اي اضافة .