الخوف من ممارسة الرسم

 ليش نخاف نبدأ نرسم ؟

يمكن أكثر شي يخوّفنا من البداية في الرسم مو إننا ما نعرف نرسم،

بل لأننا نبغى نرسم بشكل "حلو" من أول مرة.

نخاف من الورقة البيضا.

نخاف نرسم شي يطلع أقل من اللي في خيالنا.

نخاف نقول "أنا سيئة"، بدل ما نقول "أنا أتعلم".

وأحيانًا، نخاف من نظرة غيرنا أكثر من نظرتنا لنفسنا.

لكن الحقيقة؟

الرسم مو اختبار.

الرسم تجربة، تواصل، مساحة خاصة ما فيها "غلط" ولا "صح".

كل رسمة، حتى اللي نعتبرها سيئة، تقرّبنا أكثر من يدنا… ومن نفسنا.

 ليش كلنا نخاف من البداية؟

الخوف من البداية في اي شي أمر اساسي ، يخليك تتأمل الموقف من زاوية بعيدة ، يعطيك المشهد كامل ، وأنا كرسامة التردد والخوف كان من المشاعر الحاضرة في أغلب الوقت وكنت أعترف فيه دائما وهو الي وصلني إلى ما أنا عليه الان . 

لأن البداية دايم تكون "مواجهة".

في الرسم، الورقة البيضا تصير مرآة.
تعكس ترددنا، مقارناتنا، توقعاتنا العالية من نفسنا.
نحس إن أول رسمة لازم تكون عظيمة، ولا بنفشل.
ننسى إن الفن ما يبدأ بالإتقان، يبدأ بالتجربة.

نخاف نرسم شي مو مثل اللي في خيالنا.
نخاف نقول "أنا سيّء"، بدل ما نقول "أنا أتعلم".
وفي بعضنا يخاف من تعليقات الناس، حتى لو محد شاف الرسم أصلًا.

والأصعب؟
نقارن بدايتنا بـ أحد محترف له سنين يرسم، وهذي أكثر نقطة كانت دائما تلازمني ، أبغى أصير محترفة في أقل وقت 
ننسى إنهم مرّوا على نفس الخوف، ونفس الخطوط المتعرجة، ونفس الشك.

الخوف طبيعي…

 متى كانت نقطة التحول ؟ 

لحظة قررت أرسم فيها لنفسي ، مو لأحد 

جتني لحظة إدراك ولكن متأخرة،  حسيت فيها إنّي عادي أخاف وعادي م أكمل رسمتي وعادي تكون ماهي حلوة . كل مرة أمسك الالوان، أسمع صوت في راسي يقول: "ما راح يطلع حلو"، "ليه ترسمين وأنتِ ما تعرفين؟" ولا يقولي لازم تخلصيها بنفس الوقت لانه لازم تخلص في يوم .
ولكن دائما مع هذا الخوف كنت أرسم لي، مو عشان أثبت شي، ولا أتنافس، بس عشان أرتاح.
مو لازم الرسم يكون كامل، ولا حتى مفهوم… يكفيني إنه يشبهني، ويشبه اللحظة اللي كنت فيها.
يومها بس، صار الرسم ليّن، بسيط، ولأول مرة حسيت ان عادي أخذ وقتي فيه طالما أنا مستمتعة . 

 أشياء ساعدتني أتخطى الخوف

 

أرسم بدون نية أشاركها:

تعودت أنه دائما أرسم رسمات صغيرة في الاسبوع ما تاخذ مني وقت ، مو شرط أشاركها لكن لمجرد الرسم . 

استخدمت أدوات بسيطة، ما كلفت على نفسي:

أحيانا عقلنا يحاول يعقد الأمور ، وحدة من الاشياء الي يسويها يقنعك انه ماتقدر ترسم ب أشياء بسيطة وبالتالي راح توقف ترسم ، مو شرط تبدأ ب أشياء كثيرة ، يكفي أنه عندك الاساسيات . 

قبلت إن أول الرسومات بتكون عادية أو حتى "سيئة"

تذكر دائما أنه الفن م يجي بالإتقان ، يجي مع التجربة ، صرت أقدر هذي الرسمات والمحاولات وأحتفظ فيها حتى أقارن مستواي فيها مع الوقت . 

من أكثر اللوحات القديمة لي اللي أحبها ، محتفظة فيها الى الان وكل م أشوفها أكون ممتنة على كل لحظة فشلت وتدربت فيها . 

  حطّيت هدف "ارسم كل يوم شي بسيط حتى لو خط"

من أكثر الأشياء فعالية في تطوير رسمك ، التدريب المستمر ، بالنسبة لي عندي نوت بوك أعتبره شي أساسي في رحلتي في الرسم ، أهميته تعادل أهمية انجاز لوحة كاملة ، أرسم فيه بشكل مستمر رسمات بسيطة تنقذني دائما . 

   الرسم كرحلة وليس كهدف 

كثير من الناس يظنون أن الرسم مهارة ما يتقنها إلا الموهوبين ، وأن النتيجة النهائية هي كل ما يهم. لكن الحقيقة أن الرسم تجربة، رحلة نعيشها لحظة بلحظة. ما يهم انك توصل إلى لوحة مثالية، بل الاستمتاع وقت الرسم  واكتشاف كل فكرة تخطر في بالنا واحنا نرسم.

الرسم مساحة خاصة، نخطئ فيها ونتعلم ونصبر على التعلم،  نكتشف فيها أنفسنا بدون حكم أو مقارنة. وحتى إذا ما عجبك  رسمك، فإنك على الأقل حاولت خطوة 

فلا ترسم عشان تنبهر ،ارسم  عشان تشعر.

بالنهاية مهما كان مستواك، ومهما كانت رسوماتك، تذكر دايم إن كل رسمة ترسمها تقرّبك أكثر من نفسك. لا تستعجل النتيجة، استمتع بالطريق. الرسم ما هو اختبار... هو مساحة لك، لحريّتك، ولتعبيرك.